အံကပ် တပ်ဆင်သူများ လိုက်နာရမည့် အချက်များ

အံကပ်တပ်ဆင်အသုံးပြုသူများသည် တစ်နေ့လျှင် (၈)နာရီသာ အသုံးပြုရပါမည်။ (eg. အစာစားချိန်၊ ရုံးသွားချိန် နှင့် လူအများနဲ့ စကားပြောဆိုချိန်များ၌ တပ်ဆင်ထားသင့်ပြီး အိမ်တွင်အနားယူချိန်၊ အိပ်ချိန်မျိုး၌ အံကပ်ချွတ်ထားရမည်။)
အစာစားသည့်အခါ ရှေ့သွားနှင့် မဝါးရ။ အံသွားများနှင့် (၂)ဖက်ညီမျှစွာ ဝါးရမည်။
အံကပ်ချွတ်ထားချိန်တွင် သွားဖုံးသားများကို သွေးလည်ပတ်မှု ကောင်းမွန်စေရန် လက်ဖြင့် နှိပ်နယ်ပေးရပါမည်။
အစားစားပြီးတိုင်း အံကပ်အား သန့်ရှင်းရေးပြုလုပ်ရမည်။ သန့်ရှင်းရာတွင် သွားပွတ်တံ၊ ဆပ်ပြာ နှင့် ရေအေးတို့ကို အသုံးပြုရမည်။
အံကပ်ဆေးကြောသည့် ဆေးပြား (Denture Cleaner) ဖြင့်လဲ အသုံးပြု ဆေးကြောနိုင်ပါသည်။အံကပ်၏ အတွင်းမျက်နှာပြင်၊ အပြင်မျက်နှာပြင်နှင့် သွားများကို ပွတ်တိုက်သန့်ရှင်းရမည်။ သန့်ရှင်းရေးပြုလုပ်နေစဉ် ဇလုံတစ်ခုတွင်ရေထည့်ပြီး အံကပ်အောက်မှ ခံထားပေးသင့်သည်။ မတော်တဆ အံကပ်လွတ်ကျပါက မကျိုးမကွဲစေရန် ဖြစ်သည်။
အံကပ်ကို ရေနွေးဖြင့် မစိမ်ရ၊ မဆေးရပါ။ အံကပ်ကျုံ့သွား၊ လိမ်သွားနိုင်ပါသည်။
အံကပ်တပ်ပြီး အလွန်မာသော အစာ (ဥပမာ - ကွမ်းသီး၊ ငါးခြောက် )၊ အလွန်စေးကပ်သောအစာ (ဥပမာ - ကောက်ညှင်း) တို့ကို မစားသင့်ပါ။
အံကပ်အဟောင်းရှိပြီး အသစ်ထပ်မံ လုပ်သူဖြစ်ပါက အရင်အဟောင်းကို တပ်ကြည့်ခြင်းမပြုလုပ်တော့ပဲ အံကပ်အသစ်ကိုသာ တပ်ဆင်ရပါမည်။
အံကပ်ကို အသုံးမပြုသည့်အချိန်၌ အဖုံးပါသော အဝကျယ်ပုလင်း သို့မဟုတ် ဘူးတစ်ခုထဲတွင် ရေအနည်းငယ်ထည့်ကာ အံကပ်ထည့်ပြီး သိမ်းဆည်းရပါမည်။ အဖုံးဖုံးထားရမည်။
အံကပ်တစ်ခုလျှင် (၅)နှစ်ခန့် အသုံးပြုပြီးပါက အသစ်လဲလှယ်ပေးသင့်သည်။