ကမ္ဘာ့ဆီးချို၊သွေးချိုရောဂါ ကာကွယ်ထိန်းသိမ်းရေးနေ့

ယနေ့ဟာ ကမ္ဘာ့ဆီးချို၊သွေးချိုရောဂါ ကာကွယ်ထိန်းသိမ်းရေးနေ့လေး ဖြစ်ပါတယ် ။

ဆီးချို၊ သွေးချို ရောဂါ အကြောင်းကို ထဲထဲဝင်ဝင် နားလည် သဘောပေါက်ပြီး ဆီးချိုကို optimal level တစ်ခုမှာ ထိန်းနိုင်ဖို့၊
ဆီးချို ကောင်းကောင်းထိန်းနိုင်ဖို့အတွက် လိုအပ်တဲ့ စားသောက်နေထိုင်မှု ပုံစံ၊ ကိုယ်လက်လှုပ်ရှား လေ့ကျင့်ရေးများအကြောင်း အသိပညာကြွယ်ဝဖို့
ဆရာဝန်ကြီးများ ညွှန်ကြားသည့်အတိုင်း ဆီးချိုဆေးကို စနစ်တကျ သောက်သုံးခြင်းများ၊ ဆီးချိုကြောင့် နောက်ဆက်တွဲ အန္တရာယ်များကို နားလည်ထားပြီး ဂရုတစိုက် ကာကွယ်ခြင်းများ စသည်တို့ကို ဆီးချိုဝေဒနာရှင်တိုင်း သဘောပေါက်နားလည်စေဖို့ World Diabetes Day 2022 မှာ Access to Diabetes Education ဆိုပြီး Highlight လုပ်ပြထားပါတယ်။
ဆီးချို၊ သွေးချိုရောဂါသည် နာတာရှည်ရောဂါ တစ်ခုဖြစ်ပါတယ်။ အရှင်းပျောက်သွားအောင် ကုသလို့မရပါ၊ ပိုမဆိုးလာအောင် ထိန်းသိမ်းလို့ပဲ ရပါတယ်။
ဆီးချိုရောဂါလို့ စသိတည်းက ဆရာဝန် နှင့် စနစ်တကျ ကုသမှု ခံယူထားတယ်၊ အစားအသောက် ဆင်ခြင်တယ်၊ ကိုယ်လက် လှုပ်ရှားလေ့ကျင်းခန်းလည်း လုပ်တယ်ဆိုရင် ပုံမှန်လူကဲ့သို့ သေချာပေါက် သက်တမ်းစေ့ နေနိုင်ပါတယ်။
သို့သော် ဆီးချိုရောဂါကို ကြောက်တတ်ရမည်၊ ဘာမှမှ မဖြစ်သေးတာ၊ ဘာမှမှ မခံစားရတာဆိုပြီး ပေါ့ပေါ့တန်တန် သဘောထားပြီး ထိန်းထိန်းသိမ်းသိမ်း မနေရင် ရေရှည်မှာ သူကပေးတဲ့ ဒုက္ခတွေချည်းပဲ ကြုံတွေ့ရဖို့ပဲ ရှိပါတော့တယ်
ဆီးချိုရှိနေမှန်းလည်း သိတယ်၊ ဆီးချိုဆေးလည်း မသောက်ဘူး၊ အစားအသောက်လည်း မဆင်ခြင်ဘူး။
ဒီလိုနဲ့ နေထိုင်လာတာကြာရင် နှလုံး၊ ကျောက်ကပ်၊ အသည်း၊ ဦးနှောက် စတဲ့ အရေးပါတဲ့ အစိတ်အပိုင်းတွေ တဖြည်းဖြည်းထိလာမယ်၊
မျက်လုံး အာရုံကြောတွေထိပြီး မျက်လုံးကွယ်တာထိ ဖြစ်နိုင်တယ်၊
အာရုံကြော အားနည်းပြီး ခြေထောက် ထုံနာ၊ ကျဥ်နာ ဖြစ်တာကစလို့ ပိုးဝင်ကာ ခြေထောက်ပုတ်ပြီး ဖြတ်ပစ်ရတဲ့ထိလည်း ဖြစ်နိုင်တယ်။
ဆီးချိုဆိပ်သင့်ပြီး အသက်အန္တရာယ် ဆုံးရှုံးရတဲ့ အရေးပေါ်အခြေအနေတွေလည်း ဖြစ်နိုင်ပါတယ်။
တော်ရုံနဲ့ ဆေးမတိုးတော့ဘဲ ဆေးပမာဏ အများကြီးသောက်ရတာ၊ ထိုးရတာတွေ ဖြစ်လာတဲ့အခါမှာ ဆေးရဲ့ Side effect တွေလည်း ခံစားလာရဦးမယ်၊
ဆီးချိုရောဂါနှင့် အတူ အခြားသော ရောဂါတွေလည်း နောက်ဆက်တွဲမှာ ဖြစ်လာတဲ့အခါ ဝေဒနာတွေ ပိုခံစားရတယ်၊ ကုသရခက်၊ ထိန်းသိမ်းရခက်နဲ့ ဆိုးကျိုးတွေ အများကြီး လိုက်လာတာပါ။
ဒါ့ကြောင့် ဆီးချိုဝေဒနာရှင်များ ဆီးချိုရောဂါနှင့် ဆိုင်တဲ့ အသိပညာတွေ ကြွယ်ဝစေချင်ပါသည်။

ဆီးချိုအထူးကု ဆရာဝန်ကြီးများနှင့် ပုံမှန်ပြကာ စနစ်တကျ ဆီးချို ထိန်းသိမ်းပြီး ကျန်းမာသော Lifestyle တစ်ခုမှာ ပျော်ရွှင်ချမ်းမြေ့စွာ နေထိုင်နိုင်ပါစေ။